MGA PROYEKTO SA RIZAL AT QUEZON, TINALAKAY SA DISTRICT ELECTRIFICATION COMMITTEE MEETING
Ipinahayag ni Chairman at District IX Director Jeffrey Tan-Endriga ang mga plano at programa sa Rizal at Quezon nitong nakaraang District Electrification Committee Meeting.

Ayon kay Chairman Tan-Endriga nagsasagawa na ng bidding para sa pagdudugtong ng distribution line mula Barangay Maasin hanggang Barangay Isugod, Quezon at Barangay Punta Baja papuntang Barangay Iraan sa Rizal.

Sinabi ni Tan-Endriga na tutulong ang pamahalaang panlalawigan ng Palawan sa pakikipag-ugnayan sa Department of Energy at National Electrification Administration para mapondohan ang pagpapailaw sa Barangay Tagusao hanggang Barangay Quinlogan, Quezon.

Matatandaan na ipinanukala ng Paleco sa DOE na magkaroon ng Solar Power Project sa Barangay Quinlogan sa bayan ng Quezon. Hinihintay na lang na ipagkaloob ito ng naturang ahensya.

Bukod dito, may isinasagawang long-term solution para maiwasan na ang blackout dulot ng pagsagi ng sanga sa linya ng kuryente. Paliwanag ni Tan-Endriga, bare wire o wala pang balot ang karamihan ng linya ng kuryente kaya madaling magkaroon ng line fault kapag may dumikit na bagay dito. Unti-unti nang ina-upgrade ang linya at pinapalitan ng insulated wire para hindi na magkaroon ng power interruption kahit pa mapuno o madawag sa isang lugar.

Sakali namang may mga lugar na nais unahin para sa mga programa, maaring iparating ito sa Sangguniang Bayan upang makapagpasa sila ng resolusyon na siya namang tutugunan ng kaukulang ahensya.

Bilang pangwakas, hiniling ni Tan-Endriga sa mga member-customer-owners na makibahagi sa mga hakbang para maiwasan ang pagkawala ng kuryente tulad ng pagpapabatid sa Paleco kung may makikitang nakatagilid o nabubulok nang poste. Ang pakikipagtulungan ng consumers ay mahalaga rin kapag magsasagawa ng clearing operation ang mga tauhan ng Paleco.
Posted: August 30, 2018
A member-customer-owner focused electric cooperative providing efficient, quality and reliable service consistent with mandated standards.
An internationally-certified electric cooperative admired for its exemplary performance, modern technology and poverty alleviating social programs by 2024.
Telephone No. : 433-2001
Globe Mobile No. : 09175532836
Smart Mobile No. : 09989937849
Palawan Electric Cooperative | North National Highway, Bgy Tiniguiban, Puerto Princesa City | Copyright©2018